• Главная
• Информация
• Сми о нас
• ЕКІ ЖҮЗДЕН АРТЫҚ РӨЛ СОМДАҒАН

ЕКІ ЖҮЗДЕН АРТЫҚ РӨЛ СОМДАҒАН

Талантты жас актриса онда Ф.Шил­лердің «Зұлымдық пен махаббат» пь­е­са­сында Луиза бейнесін сомдап, ізденімпаз, талантты өнер иесі көпте­ген шығармашылық табыстарға же­теді. Ұлы Отан соғысы жылдарында­ғы қажырлы еңбегі лайықты бағала­нып, 1945 жылы «Құрмет белгісі» ор­дені­мен марапатталып, 1947 жылы «Қазақ КСР-інің еңбек сіңірген артисі» атағы беріледі. Ел басына күн туған заманда өзінің өнерге адалдығының арқа­сында, еңсесі түскен жұрттың рухын оятады. Күләш Сырымбетқызы 1952 жылғы 19 қазаннан бастап, бүкіл қазақ театры өнерінің қарашаңырағы – Семей­дегі Абай атындағы қазақ музыкалы-драма театрына ауысады. Қазақ театры­ның қарашаңырағы, кезінде талай театр тарланбоздары қызмет артқарған киелі өнер ордасында шы­ғар­машылық шабытын үс­те­ме­леген Күләш Сәкиева бірқатар өнер қыз­мет­керлерімен бірге қызметтес бол­ды, шығармашылық байланыста жүрді. 

Сөз арасында айта кетейік, Семей театрының қасиетті қарашаңырағына алтын өзекті уық боп қадалған, күннен-күнге керегесін кеңейткен Мұхтар Әуезов, Жұмат Шанин, Ғалиақбар Тө­ре­баев, Иса Байзақов, Әміре Қашау­баев, Фатима Әшкеева, Құрманбек Жандарбеков, Сіләмбек Қыдыралин, Хасен Байырманов, Халекет Ешмұра­тов, Гүлсім Әбдірахманова, Нуридден Атаханов, Рахия Сүлейменова, Бай­діл­дә Қалтаев, Рабиға Есімжанова, Сейфолла Мұхамеджанов, Мұқан Бектенов, Рысбек Жәкенов, Нұрмағанбет Әбішев, Күләш Сәкиева, тағы басқа актерлер мен режиссерлердің қатарын өмірін өнерге бағыштаған Ә.Жаңбырбаев, Б.Имаханов, Ж.Сәке­нова, М.Бұланов, Б.Жұманов, Е.Нұр­бае­ва, М.Бәкенов, И.Жарболов, 
Ә.Қож­мұхамедов, Мақсұт Бақтияров, Б.Сыбанов, Ш.Бахтинова сынды таланттармен толығып, олар да өз кезе­гінде аға ұрпақ жолын зор ізденіс­тер­мен жалғастырады. Небір кесек рөл­дерді сомдаған есімдері елге әйгілі майталмандар боп танылады. Бекен Имаханов сомдаған «Абай», Әбілқасым Жаңбырбаев бейнелеген Сырым, Күләш Сәкиева ойнаған «Майра», Тұратай Иісова тірілткен «Қаракөз» шынайы шеберлік пен орасан зор еңбек­тің үлгісіндей болып театр жылнамасына алтын әріптермен жазылды. Өз ортасынан оқ бойып озып шығып, тың туындыларды, тарихи тұлғаларды Күләш апамыз ерекше сомдады. 

К.Сәкиева Ә.Тәжібаевтың «Майра» спектакліндегі Майраның рөлін сомдап, қазақ халқының дарынды қызы­ның тамаша образын жасады. Актри­са­ның бұл еңбегі де бағаланып, 1958 жы­лы оған Қазақ КСР Жоғарғы Кеңесі Президиумының Жарлығымен «Қазақ КСР-інің халық артисі» деген жоғарғы атақ беріліп, екінші мәрте «Құр­мет белгісі» орденімен марапатталады.

К.Сәкиева сахна төріне шыққан күннен бастап, жарты ғасырдан астам творчестволық өмірінде екі жүзге тарта рөлдер сомдады. Ол әр кейіп­кер­­лерді бейнелеуде әр қырынан кө­рі­ніп, көрермендердің есінде қалатын жар­қын образдар жасады. Ол сомбаған Қыз Жібек, Баян, Еңлік, Ақ­тоқ­ты, Майра, Любовь Яровая, Ана – Жер-ана, Жүзтайлақ образдар және басқа да кейіпкерлер образдары қазақ сахна өнерінің төрінен лайықты орын алып, Күләш Сәкиеваның аты Қазақ Совет энциклопедиясына жазылады.

Бірде Күләш Сырымбетқызы: «Өнер деген өте киелі нәрсе, оған ерекше құрмет керек, шынайылықты жоғалт­па­ған жөн. Мен бала кезімде бір ерекше түс көргенмін, түсімде маған қанат бітіп, зеңгір көкте самғап жүр екенмін.Қазір ойлап отырсам, сол түсім осы күн­дері орындалған екен. Құдай берген өнерімнің арқасында, халықтың арқасында өзімді биіктерде жүргендей сезінемін», – деп ішкі сырын тарқатып еді. Иә, Күләш Сәкиеваның түсі дәл кел­ген екен, жастайынан жарқырап халық алдында жүрді, әлі күнге дейін театрдан қол үзген емес. Зайсандай тұнық жүрегінен, Тарбағатайдай өр мінезінен тайсалған емес. 

К.Сәкиева сахнаның ғана саңлағы емес, сонымен қатар, асқақ дауысты әнші, әрі ән сөздерін де өзі жазатын ақындық өнері де бар. Ол кісінің ре­пер­­туарында 60-тан астам ән бар, соның ішінде қазақтың халық әні «Ахау, арман», «Жетісу жерім-ай», «Ақсаусақ», «Қосжеңгей», «Жайна құрбым», «Жанай бұлбұл», т.б. көпте­ген әндері ел жүре­гіне жол тапқан. 

К.Сәкиева қоғам жұмыстарына да белсене араласты. 1955 жылы Қазақ КСР Жоғарғы Кеңесіне депутаттыққа сайланып, 1971 жылы Қазақстан Ком­пар­тиясының ХІІІ съезіне делегат болып қатысқан. 1980 жылдары Қазақ КСР-і Жоғарғы Кеңесінің грамоталарымен марапатталған. К.Сәкиева екі мәрте «Құрмет белгісі», «Парасат» ордендерінің, көптеген медальдардың иегері, Семей қаласы және Зайсан ауданының Құрметті азаматы.

Бүгінгі таңда Күләш апамыз елдің құрметті азаматшасы, еңбек демалы­сын­­дағы қарт ана. Өнер үшін ғұмырын сарп етіп, әлі күнге дейін кейінгі жас­тар­ға үлгі-өнегесін көрсетіп келеді. Өзі қартайса да, жүрегі қартаймаған рух күші бойынан кетпеген абзал ана театрымыздың тұсбағдары іспеттес. Өнерді – өмірім деп, өмірді – өнерім деп түсінген Күләш апамыз барша қазақ өнерпаздарына үлгі деп ұғамыз. Халық қошеметіне бөленген тұлға­мыз­ға ұзақ ғұмыр, саналы өмір тілейміз. 

Мерей ҚАРТОВ,
Семейдегі Абай атындағы 
қазақ музыкалық-драма театрының
Әдебиет бөлімінің меңгерушісі.